Хазинаи суғуртаи пасандозҳои шахсони воқеӣ иттилоъ медиҳад, ки бо қарори навбатии Раёсати Бонки миллии Тоҷикистон аз 3 майи соли 2021, таҳти №71 дар асоси Қонунҳои Ҷумҳурии Тоҷикистон “Дар бораи ташкилотҳои маблағгузории хурд” ва “Дар бораи барҳамдиҳии ташкилотҳои қарзӣ” иҷозатномаи Ҷамъияти саҳомии пӯшидаи Ташкилоти амонатии қарзии хурд ҶСП ТАҚХ “СМТ – Сармоя” бозхонд карда шуд.
ҶСП ТАҚХ “СМТ – Сармоя” узви низоми суғуртаи пасандозҳои шахсони воқеӣ буда, пасандозҳои шахсони воқеӣ, ки дар суратҳисобҳои пасандозӣ ва муҳлатнок, инчунин дар кортҳои пардохтии бонкӣ ҷойгиранд, аз ҷониби Хазина суғурта карда шудаанд.
Хазина ҳангоми ба вуқуъ омадани ҳолати суғуртавӣ, яъне баъд аз баромадани қарор (ҳалнома)-и суд оид ба оғози расмиёти барҳамдиҳии маҷбурии ҶСП ТАҚХ “СМТ – Сармоя”, мутобиқи Қонуни Ҷумҳурии Тоҷикистон “Дар бораи суғуртаи пасандозҳои шахсони воқеӣ” раванди пардохти ҷубронпулии суғуртаро ба пасандоздорони ташкилоти қарзии мазкур шуруъ хоҳад кард.
Ҳамчунин, Хазина эълонҳои ахборотиро оиди санаи оғози пардохти ҷубронпулӣ аз рӯи пасандозҳо, ҷой, вақт ва тартиби дархостҳо барои пардохти ҷубронпулии суғурта тавассути нашрияи расмии чопӣ, сомонаи интернетии худ ва дигар воситаҳои иртиботи оммавӣ интишор менамояд.
Маълумоти иловагӣ оид ба пардохти ҷубронпулии суғуртаро метавонед тавассути телефони (+992) 44 600-32-45 ва ё сомонаи Хазина (www.idif.tj) дастрас намоед.
Барои маълумот:
Маводи иттилоотии “ДАСТУР БА ПАСАНДОЗДОРОН”