Низоми бонкӣ – кулли шабакаи иборат аз ташкилотҳои қарзии молиявӣ мебошад. Ба он бонкҳои тиҷоратӣ, бонкҳои давлатӣ (аз ҷумла, Бонки марказӣ), бонкҳои исломӣ ва ташкилотҳои маблағгузории хурд, ки бо муштариён сару кор доранд, дохил мешаванд.

Аммо, ин на ҳамаи низоми молиявӣ мебошад, зеро он дигар ташкилотҳои молиявии муҳим – фондҳои нафақа, ширкатҳои суғуртавӣ, сармоягузорӣ ва ҳатто иштирокчиёни касбии бозори коғазҳои қиматнок ва сармояро дар бар мегирад. Ташкилотҳои мазкур барои пасандозкунӣ, нигоҳдорӣ ва афзоиши маблағҳои пулӣ имкониятҳои иловагӣ фароҳам меоранд.

🏦 Бонк чист?

Бонкҳо ҳамчун миёнарав байни онҳое, ки маблағҳои пулии озод доранд ва онҳое, ки ба ин маблағҳо ниёз доранд, баромад карда, ба муштариён хизматрасонӣ мекунанд. Яъне, шахсони воқеӣ ва ҳуқуқӣ амонату пасандозҳои худро ба бонк меоранд ва бонк дар навбати худ ба онҳое, ки мехоҳанд манзил харанд, тиҷорат кушоянд ё тиҷорати худро рушд диҳанд, қарз медиҳад. Ғайр аз ин, бонкҳо барои амалиётҳои пардохтӣ, интиқолҳои пулӣ ва бехатар нигоҳ доштани он хизмат мерасонанд.

📋 Чаро хизматрасонии бонкӣ муҳим аст?

Хизматрасонии бонкӣ пеш аз ҳама барои идоракунии маблағҳои пулӣ зарур аст, ки ҷойгиркунии маблағҳоро дар муассисаҳои бонкии боэътимод дар бар мегиранд. Тавассути хизматрасониҳои бонкӣ шумо метавонед:

• Дилпурона суратҳисоб кушоед ва маблағҳои озоди пулии худро пасандоз кунед.

• Ҳангоми зарурат аз суратҳисоби худ пули нақд гиред.

• Ба шахсони дигар интиқоли пулӣ кунед.

• Ба таври қулай ва осон амалиёти пардохтӣ ва харидро анҷом диҳед.

• Пасандоз кунед ва аз он фоида ба даст оред.

• Аз имкониятҳои хизматрасонии пешниҳоди қарз истифода баред.

💡 Маслиҳатҳои муфид барои идоракунии суратҳисоби бонкӣ:

• Бонк ё дигар ташкилоти қарзии молиявиеро интихоб кунед, ки ба талаботи шумо мувофиқ бошад — сатҳу сифати пардохтҳо, комиссия, хизматрасонӣ ва фоизҳои онро муқоиса кунед.

• Ҳисоби бонкии худро мунтазам назорат кунед.

• Барои дастрасӣ ва мониторинги осон аз хизматрасонии интернет-бонкинг истифода баред.

📋 Қарз чист?

Қарз ба шумо имкон медиҳад, ки аз ташкилоти қарзӣ (масалан, бонк) бо ӯҳдадории пардохт маблағ ва фоизҳо ба мӯҳлати муайян ва бо шартҳои дар шартнома мувофиқашуда, қарз гиред.

💳 Вобаста аз истифода, қарзҳо намудҳои зерин доранд:

• Қарзи кӯтоҳмуддат дар шакли кортҳои кредитӣ, ки бо он шумо метавонед аз маблағҳои бонкӣ дар доираи ҳудуди қарзӣ барои эҳтиёҷоти худ истифода баред.

• Қарзҳои истеъмолӣ – маблағҳои барои мақсадҳои муайян муқарраршуда (масалан, барои рухсатии меҳнатӣ, таъмири хона, таълими фарзанд).

• Қарз барои хариди мошин(автокредит).

• Қарзи ипотекӣ – қарзҳои дарозмуддат барои хариди манзил.

📈 Чӣ тавр қарзро бояд бомасъулият истифода бурд?

Маблағи қарзи гирифаро сари вақт пардохт кунед – аз таъхири пардохти он худдорӣ кунед ва рейтинги кредитии худро беҳтар кунед, зеро агар шумо қарзро саривақт пардохт накунед, пас ба хавфи мушкилии аз ин ҳам калонтари қарзӣ дучор шуданро доред.

Ба қадри зарурӣ қарз гиред – аз маблағе, ки шумо метавонед бе мушкилот баргардонед, зиёд қарз нагиред.

Рейтинги кредитии худро назорат кунед – таърихи қарзии худро тавассути бюроҳои қарзӣ пайгирӣ кунед.