Маълумот оид ба раванди пардохти ҷубронпулии суғурта ба пасандоздорони ҶСК “Тоҷиксодиротбонк”
07.07.2021
Хазинаи суғуртаи пасандозҳои шахсони воқеӣ (минбаъд Хазина) иттилоъ медиҳад, ки аз санаи 23 июни соли 2021 раванди пардохти ҷубронпулии суғурта ба пасандоздорони бонки барҳамдодашудаи ҶСК “Тоҷиксодиротбонк” мавриди амалӣ қарор дорад.
Тибқи ҳисоботҳои фосилавӣ, дар давраи аз 23 июн то 6 июли соли равон аз тарафи бонк-агент дар асоси феҳристи пасандоздорон барои пардохти ҷубронпулии суғурта ба 1 974 нафар пасандоздори муроҷиаткардаи ҶСК “Тоҷиксодиротбонк” ба маблағи 32,5 миллион сомонӣ, ки 55 фоизи ҳаҷми умумии маблағи ҷубронпулии суғурта аз рӯи пасандозҳои шахсони воқеии бонки мазкурро ташкил медиҳад, пардохтҳо анҷом дода шудаанд.
Ҷараёни пардохт (ба санаи 06/07/2021)
Пардохтҳо тавассути ҶСК “Ориёнбонк”, ки аз номи Хазина ва аз ҳисоби он ба сифати бонк-агент баромад мекунад, амалӣ шуда истодаанд. Барои хизматрасонии пасандоздорони бонки барҳамдодашудаи ҶСК “Тоҷиксодиротбонк” 33 воҳиди сохтории бонк-агент дар ҳамаи минтақаҳои Ҷумҳурии Тоҷикистон сафарбар карда шудаанд, аз ҷумла дар шаҳри Душанбе (сарбонк ва 4 филиал), Вилояти Мухтори Кӯҳистони Бадахшон (1 филиал), Вилояти Суғд (11 филиал), Вилояти Хатлон (8 филиал) ва ноҳияҳои тобеи ҷумҳурӣ (8 филиал). Руйхати филиалҳои ҶСК “Ориёнбонк”, ки тавассути онҳо пардохти ҷубронпулии суғурта ба пасандоздорони ҶСК “Тоҷиксодиротбонк” анҷом дода мешавад, дар сомонаи Хазина дастрас аст.
Мутобиқи қонунгузорӣ раванди пардохти ҷубронпулии суғурта ба пасандоздорон дар давоми то як сол амалӣ карда мешавад. Бинобар ин, пасандоздорон барои гирифтани ҷубронпулии суғурта метавонанд дар давоми то як сол дар дилхоҳ вақти муносиб ба бонк-агент муроҷиат намоянд. Ҳамзамон, Хазина ба ҳамаи пасандоздорони бонкҳои барҳамдодашуда хотиррасон менамояд, ки ҳангоми муроҷиат ба бонк-агент ҳатман қоидаҳои санитарию гигиенӣ ва масофаи иҷтимоиро риоя кунанд.
Маълумоти иловагӣ оид ба пардохти ҷубронпулии суғуртаро метавонед тавассути манбаҳои зерин дастрас намоед:
- Маркази тамос:
(+992) 44 600-32-45 - Еmail:
info@idif.tj - Сомонаи Хазина:
www.idif.tj - Фейсбук:DepositInsuranceFund.Tajikistan
- Телеграм:
t.me/IDIFtj