Тартиби аз ҷониби ташкилотҳои қарзӣ пешниҳоди маълумот ба пасандоздорон
Мутобиқи Қонуни Ҷумҳурии Тоҷикистон “Дар бораи суғуртаи амонату пасандозҳо” (минбаъд Қонун) фаъолияти низоми суғуртаи ҳатмии амонату пасандозҳо пеш аз ҳама барои ҳимояи давлатии ҳуқуқ ва манфиатҳои қонунии пасандоздорон аз хавфи муфлисшавии ташкилотҳои қарзӣ, равона гардидааст.
Низоми суғуртаи амонату пасандозҳо кафолати ҷуброни маблағҳои пасандоздоронро дар доираи андозаи муқаррарнамудаи Қонун ба таври ройгон таъмин менамояд, ки ин бевосита ба сатҳи боварӣ ва эътимоди аҳолӣ ба низоми бонкӣ, инчунин суботи молиявии кишвар таъсири мусбӣ мерасонад.
Барои аҳолӣ, бахусус мизоҷони потенсиалии ташкилотҳои қарзӣ, боварӣ ба низоми бонкӣ ҳамчун омили асосӣ баромад намуда, чӣ қадаре ки аҳолӣ оиди механизми суғуртаи амонату пасандозҳо маълумоти бештар дошта бошанд, ҳамон қадар барои истифодаи маҳсулотҳои бонкӣ, аз ҷумла кушодани суратҳисобҳои амонату пасандоз мароқ зоҳир менамоянд. Дар навбати худ, ҳамаи ин ба афзоиши ҷалби пасандозҳо ва пойгоҳи захиравии ташкилотҳои қарзӣ, билохир сатҳи қарздиҳӣ ба соҳаҳои мухталифи иқтисодиёт ва рушди иқтисоди кишвар мусоида менамояд.
Бинобар ин, барои таъмини самаранокии фаъолияти низоми суғуртаи амонату пасандозҳо бағоят муҳим аст, ки ба аҳли ҷомеа ва пасандоздорон пайваста дар бораи моҳият ва афзалиятҳои суғурта гардидани амонату пасандозҳо, сатҳи фарогирии суғуртавии амонату пасандозҳо (субъект ва объекти ҳатмии суғурта), андозаи ҷубронпулӣ ва фаъолияти Хазина, мунтазам маълумоти муътамад ва кофӣ расонида шавад.
Тибқи Қонун ташкилотҳои қарзии – узви Хазина уҳдадор мебошанд, ки ба пасандоздорон пешниҳоди маълумотро тибқи “Тартиби аз ҷониби ташкилотҳои қарзӣ пешниҳоди маълумот ба пасандоздорон оид ба низоми суғуртаи амонату пасандозҳо” ба таври доимӣ таъмин намоянд. Тартиби мазкур маҷмӯи чорабиниҳои амалишавандаро аз ҷониби ташкилотҳои қарзӣ дар самти пешниҳоди маълумот ба аҳолӣ ва пасандоздорон оид ба низоми суғуртаи амонату пасандозҳо, оиди узвияти худ дар Хазина, оиди намудҳои амонату пасандозҳои суғурташаванда, андозаи ҷубронпулӣ ва дигар ҷабҳаҳои марбута, муайян менамояд.
Ташкилотҳои қарзӣ уҳдадоранд раванди маълумотдиҳӣ ва пешниҳоди ахбороти дахлдорро оид ба низоми суғуртаи амонату пасандозҳо ва иштироки худро дар он ба пасандоздорони (шахсони воқеӣ ва ҳуқуқӣ) маблағҳояшон суғурташаванда ва аҳолӣ (мизоҷон) тибқи талаботи Тартиби мазкур дар шакли муайян саривақт ва ба таври дақиқу дастрас ба роҳ монанд.
